ترددت كثيرًا في كتابة هذا الكلام، وبعد ما شاورت المقربين والزملاء الكل رفض إني أتحدث خلال هذا الوقت، لكن اعتدت إني أكون صريح وصادق مع متابعيني وأصدقائي اللي تربطني بهم علاقة هنا بتويتر من زمان، فقررت أشارك هذي النقاط، ليس تأثرًا بما حدث .. لا والله، بل توضيحًا للناس اللي تثق وتحب علي يعقوب فقط، وإن شاء الله ما يزعلون مني الزملاء 😁
- أولًا: إيه، علي يعقوب اللي كان يغرد عن القنوات مدحًا أو نقدًا أو ملاحظات، هو موظف الآن في ثمانية، وهذا شيء أنا معلنه وأنتم تعلمون فيه، فما في شي هنا أخفيه
- ثانيًا: أنا عندي مبادئ ووجهات نظر متمسك فيها، وكل التغريدات اللي شاركتوها على أساس إنكم مسكتم علي شيء كان أقدر أحذفها قبل لا يطلع الخبر بكل سهولة، لكن لا، ما راح أحذف أي تغريدة أو أي شي. هذي آرائي وما زلت متمسك بأغلبها، وحتى اللي تغيرت قناعاتي فيها ما راح أحذفها لأنها جزء مني ومن تاريخي. ويا ليت تبحثون عن تغريداتي القديمة اللي طالبت فيها بالتشفير الكامل للدوري، وبرجع لها تحت.
- ثالثًا: أنا شخص مهني، فلا تتوقع إني بطلع أكتب على أي شي ما يعجبني عشان تجي أنت وياه تقولون: أوه علي يعقوب رجال صنديد ما يخاف كفوو والله، لا اسمح لي، هذا ما راح يصير. للعمل أدبيات وأخلاقيات وبإذن الله إني ملتزم فيها، ومثل ما أنا متمسك بآرائي وتاركها هنا "لو كانت بتضرني ما كانت وصلتني للمكان اللي أنا فيه"
- رابعًا: أنا عاذر كل المنبرشين اللي أخذوا التغريدة ورموها في منشني ومنشن كل هامور، وما بلّكت أحد إلا قليل الأدب اللي يسب ويشتم او الساذج.
مثال : واحد هامور أعرفه زين كتب عني وأرسل لي بالخاص: سامحني بس الموضوع قاعد يجيب تفاعل🤣 بالله عليك !!!
- خامسًا: ثمانية، مثل أي مؤسسة إعلامية خاصة، تدفع مبالغ كبيرة عشان تحصل على الحقوق، ومن الطبيعي إن بعض الامتيازات والمحتوى يكون مدفوع، وهذا معمول فيه في كل العالم وبتشفير كامل.
ورأيي الشخصي و للي كتبته من زمان قبل ما أكون في ثمانية (والصورة مرفقة)، إني مع التشفير لأنه يرفع جودة المنتج ويحفظ قيمته. لكن هذا رأيي الشخصي
- سادسًا: النقد حق مشروع، وأنتم تعلمون إني كنت من أكبر المنتقدين للقنوات المدفوعة اللي ما تقدم خدمة جيدة و"تضحك" على متابعيها مستغلة جهل الأغلبية بالتقنيات والمحتوى ، وانا هنا ما اقول انه ثمانية كاملة بس أقدر أؤكد لكم إن ثمانية مو من هالنوع، بل ثمانية حريصة تسمع وكل ما تكتبونه يوصلهم، وحريصة أيضًا إنها تجتهد وتحسّن تجربة المتابع وتحاول جاهدة توفر له أحدث الامتيازات التقنية، وما تكتفي ببث ما يأتيها كما هو بل تحاول تحسنه و تقدمه لمشتركيها
- سابعًا: ثمانية قدّمت استديوهات وبرامج متنوعة لكل الفئات: شيبان، شباب، صغار، ترفيهي، جاد، لقاءات، وثائقيات... وهذا ما أقوله منّة أو تفضّل، بل هو واجب ثمانية تجاه المتابع، وراح تستمر فيه وتطوّره.
- ثامنًا واخيرًا : إن كنت تعتقد إن علي يعقوب راح يطلع ينتقد الجهة اللي يعمل فيها، حاب أقولك انسى. هذا المكان آمن بعلي ليس لأجل تسكيته، بل أعطاه صلاحيات ومسؤوليات، وهذي ثقة وأمانة راح أكون مُساءل فيها أمام الله. أدري إن كلامي بيزعّل كثيرين، لكن من يعرفني، خاصةً متابعيني القدامى، يعرفون إني صريح وما أقبل المزايدة أو التطبيل. هذا كلام بالخاطر موجه لهم، وعاذر أي شخص انبرش إلا من قلّ أدبه
وعلي يعقوب هو علي يعقوب مع ثمانية و قبل ثمانية
المعذرة على الاطالة .. وكل التوفيق للجميع
